Bugun Xitoyning Usi shahridagi "World Taekwondo Center Stadium" majmuasida taekvondo WT bo‘yicha kattalar o‘rtasida "Katta dubulg‘a" saralash musobaqasi boshlandi.
Turnirning ilk kuni doirasida O‘zbekiston milliy terma jamoasining to‘rt nafar vakili — Diyorbek To‘xliboyev (68 kg), Najmiddin Qosimxojiyev (68 kg), Shuhrat Salayev (+80 kg) va Feruza Sodiqova (67 kg) dayangga ko‘tarildi.
Quvonarlisi, og‘ir vazn toifasida bahslarda ishtirok etgan Shuhrat Salayev musobaqaning kumush medaliga ega chiqdi. Neytral maqomdagi Rafael Alyukayevga qarshi bahsda hamyurtimiz kichik hisobli farq bilan imkoniyatni boy bergan bo‘lsa-da, 2026-yilda o‘tkaziladigan "Katta dubulg‘a" asosiy musobaqasi ishtirokchisiga aylandi.